Trajnim mbi Pagën e Jetesës dhe të Drejtat në Punë në Vlorë

Në 26 mars 2025, në qytetin e Vlorës u zhvillua një trajnim me pjesëmarrjen e 17 grave dhe vajzave nga komuniteti lokal. Qëllimi i trajnimit ishte të forconte njohuritë e pjesëmarrëseve mbi konceptin e pagës së jetesës dhe rëndësinë e saj në kushtet aktuale të tregut të punës në Shqipëri.

Gjatë trajnimit, u trajtuan këto tema kryesore:

• Përkufizimi i pagës së jetesës dhe dallimi nga paga minimale ligjore
• Elementët bazë që duhet të mbulojë një pagë e jetesës (ushqim, strehim, transport, shërbime shëndetësore, arsim dhe kursime modeste)
• Paga e jetesës si një standard ndërkombëtar dhe rëndësia e saj globale
• Roli i markave të mëdha dhe zinxhirëve të furnizimit në përcaktimin e pagave në sektorë si ai fason
• Përmasat e hendekut ndërmjet pagave reale dhe kostos së jetesës në Shqipëri, me fokus të veçantë në kontekstin lokal të Vlorës
• Prezantimi i Deklaratës për Pagën e Jetesës të hartuar nga GADC
• Rrugë të mundshme për përfshirjen e shoqërisë civile dhe vetë punonjësve në avokimin për zbatimin e këtij standardi

Trajnimi u zhvillua në një atmosferë miqësore dhe interaktive, ku pjesëmarrëset patën mundësi të njihen me materiale informuese dhe të reflektojnë mbi mënyrat konkrete për të ndikuar në përmirësimin e kushteve të punës dhe për të mbështetur kërkesën për paga të dinjitetshme.

Ky aktivitet është pjesë e nismës së GADC për të promovuar të drejtën për punë të denjë dhe për të fuqizuar gratë në komunitet nëpërmjet informacionit, ndërgjegjësimit dhe veprimit kolektiv.

Aktiviteti u organizua ne kuader te projektit:  Përmirësimi i Kushteve të Punës në Industrinë e Tekstilit dhe Këpucëve në Evropën Juglindore – Vazhdueshmëria. 
Donatori: Bread for Life
Organizata udhëheqëse: Center for the Politics of Emancipation, Serbi
Organizatat zbatuese: Qendra Aleanca Gjinore për Zhvillim (Shqipëri) dhe ZORA (Bosnje dhe Hercegovinë)