Kur profesionistët e shëndetit ndihen më të sigurt, edhe viktimat e dhunës ndihen më të mbrojtura

Për shumë punonjës të kujdesit shëndetësor parësor, përballja me rastet e dhunës me bazë gjinore, përveç se sfidë profesionale, është njëkohësisht edhe përgjegjësi njerëzore që kërkon njohuri të sakta, ndjeshmëri dhe koordinim të fortë institucional.

Qendra “Aleanca Gjinore për Zhvillim” mblodhi në Tiranë 32 profesionistë të shëndetit nga qytete të ndryshme të Shqipërisë për të forcuar pikërisht këto aftësi. Përmes ushtrimeve praktike, studimeve të rasteve dhe diskutimeve të hapura, pjesëmarrësit punuan mbi identifikimin e hershëm të shenjave të dhunës, komunikimin etik me pacientët dhe përdorimin e mekanizmave të referimit.

Çfarë fituan pjesëmarrësit: Ata u njohën me mjete konkrete depistimi, praktika standarde raportimi dhe mënyra për të integruar qasjen e ndjeshme ndaj gjinisë në punën e përditshme klinike.

Çfarë ndryshoi për ta: Diskutimet dhe role-play ndihmuan profesionistët të reflektojnë mbi situata reale dhe të ndihen më të sigurt në ndërveprimin me persona që mund të jenë në situata vulnerabël, duke rritur empatinë dhe besimin në veprimet e tyre.

Pse ka rëndësi: Forcimi i kapaciteteve të stafit shëndetësor kontribuon drejtpërdrejt në një sistem më të përgjegjshëm dhe më të koordinuar për mbrojtjen e personave të prekur nga dhuna me bazë gjinore.

Trajnimi u organizua dhe u zhvillua nga Qendra “Aleanca Gjinore për Zhvillim” në kuadër të projektit AGORA, i zbatuar në partneritet me Shoqata Together for Life dhe Institute of Romani Culture in Albania – IRCA, në bashkëpunim me Bashkimin Evropian .

Ky publikim është realizuar me mbështetjen financiare të Bashkimit Evropian. Përmbajtja e tij është përgjegjësi e vetme e autorit dhe nuk pasqyron domosdoshmërisht pikëpamjet e Bashkimit Evropian.