Activities

Reagim publik: Mbi projektligjin “Për Barazinë Gjinore” dhe përdorimin e termit “gjini”

Reagim publik
Mbi projektligjin “Për Barazinë Gjinore” dhe përdorimin e termit “gjini”

Ne përfaqësues të organizave në mbrojtje të të drejtave të njeriut po ndjekim me vëmendje diskutimet e ditëve të fundit mbi projektligjin e ri për Barazinë Gjinore, dhe në veçanti debatin mbi përdorimin e termit “gjini” në vend të formulimit klasik “burrë–grua”.

Dhe dëshirojmë të theksojmë se ky ndryshim është:

1. Një hap i domosdoshëm drejt standardeve moderne evropiane
Përdorimi i termit “gjini” është i përafruar me acquis të Bashkimit Evropian, me Konventën për Eliminimin e të Gjitha Formave të Diskriminimit ndaj Grave (CEDAW) dhe me Konventën e Stambollit, duke garantuar që Shqipëria ecën krah për krah me vendet më progresive evropiane. Vendet që kanë përfshirë termin “gjini” nuk kanë humbur asgjë nga kohezioni i tyre social – përkundrazi, kanë fituar një shoqëri më gjithëpërfshirëse, të drejtë dhe demokratike.

2. Një garanci për mbrojtjen e dinjitetit njerëzor
Koncepti “gjini” nuk mohon ekzistencën e burrit dhe gruas. Ai i përfshin ata, por në të njëjtën kohë zgjeron mbrojtjen ligjore për individët që diskriminohen për shkak të identitetit gjinor, shprehjes gjinore apo karakteristikave të seksit. Në këtë mënyrë, çdo qytetar/e gëzon mbrojtje të barabartë dhe efektive nga ligji.

3. Një instrument kundër diskriminimit dhe stereotipeve
Patriarkalizmi dhe përdorimi i ngurtë i ndarjes “burrë–grua” kanë ndihmuar historikisht në ruajtjen e pabarazive dhe kufizimin e rolit të grave në shoqëri. Përdorimi i termit “gjini” i hap rrugë politikave më gjithëpërfshirëse, statistikave më të sakta dhe një gjuhe që shmang stereotipet diskriminuese.

4. Një shenjë e qartë e orientimit europian të Shqipërisë
Me këtë hap, Shqipëria tregon se dëshiron të jetë më pranë vendeve moderne evropiane, që kanë ndërtuar legjislacion gjithëpërfshirës për barazinë gjinore, dhe jo pjesë e atyre vendeve patriarkale ku pabarazitë gjinore vazhdojnë të mbahen të justifikuara përmes ndarjeve të ngushta dhe diskriminuese.

Ne, mbështesim fuqimisht projektligjin e ri “Për Barazinë Gjinore” dhe e konsiderojmë përdorimin e termit “gjini” si një hap përpara për demokracinë, respektimin e të drejtave të njeriut dhe përpjekjet e Shqipërisë drejt integrimit evropian.

Qendra “Aleanca Gjinore për Zhvillim” (GADC)

Rrjeti i Fuqizimit të Gruas në Shqipëri (AWEN)

Aleanca LGBT – Aleanca Kundër Diskriminimit LGBT

Linja e Këshillimit për Gra e Vajza

Qendra Psikosociale “Vatra”

Shoqata “BashArt”

CRCA-ECPAT Shqiperi

Ambasada PINK

Qendra "Strehëza Edlira Haxhiymeri"

YWCA Albania

Nisma per Ndryshim Shoqeror ARSIS

Qendra Komunitare sot per Te Ardhmen