Të Drejtat në Punë dhe Pagat e Denja: Takim me Gra Punonjëse në Sektorin Fason – Shkodër

Më 6 nëntor 2024, Qendra Aleanca Gjinore për Zhvillim organizoi një takim të veçantë me gratë punonjëse të fabrikës Madish në Shkodër, që operon në sektorin e prodhimit të veshjeve. Tema kryesore e këtij takimi ishte “Mbrojtja e të Drejtave të Grave në Tregun e Punës.”

Takimi shërbeu si një platformë për të adresuar sfidat me të cilat përballen gratë në përditshmërinë e tyre të punës. Diskutimet u përqendruan te çështje të rëndësishme si: sëmundjet profesionale, mbrojtja për gratë shtatzëna, puna gjatë natës, leja e mëmësisë, përkujdesja për fëmijët, pushimet prindërore, orët dhe turnet e punës, si dhe respektimi i kohës javore të punës dhe pushimeve.

Takimi u fokusua gjithashtu tek çështjet e shëndetit në fabrikat e fasonerisë, duke trajtuar incidentet në punë, sëmundjet profesionale dhe përmbushjen e standardeve të sigurisë dhe shëndetit nga fabrikat.

Një element i rëndësishëm i takimit ishte diskutimi për pagat e denja. U theksua rëndësia e garantimit të një shpërblimi të drejtë për punën që këto gra kryejnë, duke theksuar se barazia gjinore duhet të reflektohet edhe në vlerësimin financiar të kontributit të tyre.

Gjithashtu, u nënvizua domosdoshmëria e organizimit dhe bashkëpunimit mes grave punonjëse. Vetëm duke bashkuar forcat dhe ngritur zërin, mund të arrihet ndryshimi i kushteve të punës dhe sigurimi i të drejtave të tyre.