Workshop-i i radhës në Dibër: Thellimi i njohurive mbi ekstremizmin

Më 21 nëntor 2024, Qendra Aleanca Gjinore për Zhvillim (GADC) organizoi një workshop njëditor në Dibër, në kuadër të projektit “Krijimi i të Ardhmes: Fuqizimi i Grave të Reja për të Kundërshtuar Ekstremizmin dhe Radikalizmin,” mbështetur financiarisht nga Zyra e Marrëdhënieve me Publikun të Ambasadës së SHBA në Tiranë.

Ky aktivitet bashkoi mësuese, mjeke dhe infermiere nga 15 njësitë administrative të Dibrës për të forcuar njohuritë dhe ndërgjegjësimin e tyre mbi ekstremizmin e dhunshëm.

Workshopi kishte si synim pajisjen e pjesëmarrësve me njohuri të thelluara mbi shkaqet lokale të ekstremizmit, zbatimin e strategjive efektive për parandalimin e tij dhe promovimin e bashkëpunimit ndërmjet institucioneve publike, autoriteteve lokale dhe shoqërisë civile.

Një pjesë e rëndësishme e diskutimit me pjesëmarrëset ishte mënyra e identifikimit dhe raportimit të rasteve të dyshuara, duke theksuar rëndësinë e rolit të tyre në krijimin e një rrjeti efektiv raportimi dhe ndërhyrjeje. Ky bashkëpunim synon të krijojë një qasje të qëndrueshme dhe gjithëpërfshirëse për përballimin e këtyre sfidave.