Tubimi paqësor për 1 Maj 2024

Unioni i Sindikatave Shqiptare dhe Koalicioni për të Drejtat në Punë, i përbërë nga organizata të shoqërisë civile dhe sindikata, ku është pjesë edhe  Qendra Aleanca Gjinore për Zhvillim, organizoi një tubim paqësor në Bulevardin Dëshmorët e Kombit përballë “Kryeministrisë” në 1 Maj 2024. Nën sloganin "DINJITET PËR PUNËTORËT!", ky tubim kishte për qëllim të sensibilizonte punonjësit, të lobonte për dëgjimin e zërit të tyre dhe të ndikonte në ndryshimet në politika dhe ligje për mbrojtjen e të drejtave të punëtorëve.

Punonjësit nga sektorë të ndryshëm si fasoneria, shëndetësia, arsimi, pastrimi, call center, nafta, shërbimet publike, transporti, etj, ndanë historitë e tyre personale, mesazhet dhe kërkesat për institucionet përkatëse në këtë ditë të përkujtimit të përpjekjeve dhe sfidave që punonjësit kanë hasur në vendin e punës. Gjithashtu, u diskutua edhe rritja e emigrimit të forcës punëtore, duke lënë sektorë të caktuar të punës në vështirësi.

Në këtë tubim, Unioni i Sindikatave Shqiptare dhe Koalicioni për të Drejtat në Punë drejtuan një thirrje publike kryeministrit dhe institucioneve të vendit për të ndërmarrë hapa të menjëhershëm për të adresuar shqetësimet e punonjësve dhe për të garantuar mbrojtjen e të drejtave të tyre në vendin e punës. Thirrja përfshinte kërkesa për përllogaritjen dhe vendosjen e minimumit jetik nga shteti shqiptar, sigurimin e kushteve të punës të sigurta dhe të shëndetshme, reformimin e institucioneve të punës në Shqipëri, si dhe ndërtimin e një mjedisi të ndershëm pune dhe respektimin e të drejtave të punëtorëve dhe sindikatave.

Kjo thirrje publike u bë në përgjigje të nevojave dhe sfidave që kanë hasur punonjësit në Shqipëri, duke mbështetur misionin e promovimit dhe mbështetjes së të drejtave në punë dhe punës së denjë.