Analiza e Zinxhirit të Vlerave me Perspektivë Gjinore në nën-sektorin e Vajit të Ullirit

Qendra Aleanca Gjinore për Zhvillim (GADC) në kuadër të projektit: "Fuqizimi Ekonomik i Grave dhe perspektiva gjinore në zinxhirin e vlerave të biznesit", mbështetur nga Gender Equity and Equality Action (GEEA) i Departamentit të Shtetit, prezanton analizën e zinxhirit të vlerave të biznesit me perspektivë gjinore në nën-sektorin e vajit të ullirit.

Kjo analizë trajton sfidat dhe mundësitë e përfshirjes së grave në zinxhirin e vlerave me perspektivë gjinore të prodhimit të vajit të ullirit në Tiranë. Analiza hedh dritë mbi karakteristikat unike të nën-sektorit të vajit të ullirit në Shqipëri, i karakterizuar nga bujqësia për mbijetesë, të ardhura të ulëta dhe informalitet i lartë, dhe identifikon kufizimet që lidhen me ofruesit e shërbimeve. Kjo analizë është e vlefshme për përmirësimin e pozicioneve të grave brenda zinxhirëve të vlerave të vajit të ullirit dhe promovimin e analizave të zinxhirit të vlerave me perspektivë gjinore në Shqipëri, duke marrë parasysh ndikimin e rëndësishëm të nën-sektorit në ekonominë e vendit.

Projekti "Fuqizimi Ekonomik i Grave dhe perspektiva gjinore në zinxhirin e vlerave të biznesit" i dedikohet fuqizimit të grave sipërmarrëse në Tiranë.

Qëllimi i projektit është fuqizimi i grave, reduktimi i pasigurive me të cilat gratë përballen duke kryer një analizë gjinore të zinxhirit të vlerave të biznesit në disa sektorë, dhe fuqizimi i grave sipërmarrëse për të marrë role më aktive në ekonomi.

Seminari do të mbahet në datë 01 Nëntor 2023 ora 10:00 tek DESTIL Creative Hub Albania, Blvd “Zogu i Parë”.

Ju lutem konfirmoni pjesëmarrjen në adresën e email: [email protected]