Konferencë Kombëtare: Pjesëmarrja dhe Përgjegjësia e Shoqërisë Civile në Proceset e Qeverisjes Vendore

Me datë 22.12.2020, Qendra Aleanca Gjinore për Zhvillim në partneritet me anëtarët e Rrjetit POP (Përballja e Ofertave Politike), dhe me mbështetjen e Qeverisë Suedeze përmes Olof Palme Center dhe National Endowment for Democracy organizuan Konferencën Kombëtare “Pjesëmarrja dhe Përgjegjësia e Shoqërisë Civile në Proceset e Qeverisjes Vendore”. Ky aktivitet u zhvillua në ambientet e Hotel Rogner si dhe me pjesëmarrjen e 140 personave online nga 9 bashki të vendit.

Gjatë këtij takimi u shkëmbyen përvoja bashkëpunimi mes organizatave anëtare të POP me bashkitë e monitoruara: Tiranë, Durrës, Kukës, Pukë, Vlorë, Fier, Kamëz, Pogradec, Shkodër. U zhvilluan edhe diskutime mbi punën e bashkive në drejtim të përmbushjes së prioriteteve të komunitetit të hartuara në Kontratat Sociale dhe të monitoruara prej dy vitesh.

Mes të tjerash, në këtë konferencë u diskutua gjithashtu:

• Ndikimi i metodologjisë POP në proceset demokratike vendore.
• Sfidat e hasura gjatë punës së organizatave anëtare.
• Shkëmbimi i përvojave ndërmjet bashkive.
• Procesi i buxhetimit me pjesëmarrje.
• Angazhimi i kryetarëve të bashkive për të vazhduar bashkëpunimin dhe për të çuar përpara demokracinë vendore dhe bashkëpunimin me qytetarët dhe OSHC-të.
• Ndikimi i COVID-19 dhe çështjeve të tjera në jetën vendore.
• Gjatë viteve 2019 – 2020, nga 101 prioritetet kryesore të Kontratave Sociale në 9 bashki, 58% janë adresuar pjesërisht, 17% janë adresuar plotësisht dhe 25% e këtyre prioriteteve, edhe pse të konsultuara, nuk kanë marrë ende dritën jeshile për adresimin dhe përmbushjen.

Në takim morën pjesë kryetarë dhe nënkryetarë të nëntë bashkive nën monitorimin e rrjetit POP, në vend dhe online. Në sallën Antigonea patëm kënaqësinë të mirëprisnim Znj. Romina Kuko, Zv/Ministre e Brendshme që mbulon pushtetin vendor; Znj. Voltana Ademi, kryetare e Bashkisë së Shkodrës; Z. Florian Tahiri Nënkryetar i Bashkisë së Durrësit; si dhe në lidhje online Z. Johan Schmid, Drejtor për Evropën Juglindore, Olof Palme International Center.

Disa nga përfundimet e nxjerra në fund të konferencës ishin:

• POP është një platformë neutrale dhe si e tillë, ky projekt ka qenë i suksesshëm në demokracinë vendore duke angazhuar shoqërinë civile dhe komunitetin;
• Vetë rrjeti POP është i përbërë nga organizata lokale dhe ka ndihmuar në rritjen e kapaciteteve të këtyre organizatave;
• POP është i hapur për bashkëpunim me organizata të tjera të shoqërisë civile, qoftë në bashkitë ekzistuese apo në bashki të reja për të ndjekur të njëjtën metodologji;
• Rrjeti mundëson shkëmbimin e përvojave ndërmjet bashkive të ndryshme, nën monitorimin e Kontratave Sociale, bashki që i kanë nënshkruar ose nuk i kanë nënshkruar ato;
• POP ka kontribuar që komuniteti të informohet se pjesëmarrja e tij publike është një domosdoshmëri në procesin e vendimmarrjes së qeverisjes vendore;
• POP ka një partner shumë të rëndësishëm që është komuniteti i këtyre bashkive dhe rrjeti shërben si përcjellës zëri dhe urë lidhëse mes tyre dhe përfaqësuesve të pushtetit vendor.
• Janë nënshkruar 6 kontrata, presim të lidhen edhe 3 të tjera me angazhimin e bashkisë Shkodër, Kukës dhe Pukë deri në fillim të 2021