Puna Jonë
Fuqizimi Ekonomik i Grave
Fuqizimi Ekonomik i Grave
- Pavarësia ekonomike dhe sipërmarrja e grave
- Pavarësia ekonomike e grave dhe mundësia për rritje
- Nxitja e fuqizimit ekonomik dhe sipërmarrjes së grave
Shqipëria ka një treg pune me ndarje të thellë gjinore. Statistikat e kohëve të fundit tregojnë që vetëm 59.3% e grave marrin pjesë në tregun e punës të vendit, krahasuar me rreth 74% të burrave. Ky përjashtim i dukshëm i grave nga forca punëtore është i lidhur me humbjen e produktivitetit dhe pengon rritjen ekonomike dhe sociale. Gjithashtu, vetëm 26.8% e sipërmarrjeve kombëtare janë në pronësi të grave, gjë që thekson nevojën urgjente për të thyer ‘tavanin e qelqtë’.
GADC është e përkushtuar në kontributin e saj për krijimin e një praktike kërkimi dhe advokimi me qëllim nxitjen dhe promovimin e pavarësisë ekonomike të grave. Kjo sigurohet përmes trajnimit dhe edukimit; lehtësimit të balancës punë-jetë; qasjes në punë cilësore të paguara duke adresuar barrën e përkujdesjes dhe punës së papaguar; punës për eliminimin e normave diskriminuese gjinore dhe sociale; dhe sigurimit të qasjes së grave në prona, asete dhe shërbime financiare. Ne besojmë që duhet inkurajuar dhe advokuar për zhvillimin e mëtejshëm të sipërmarrjes së grave, si një mënyrë për të mbyllur hendekun gjinor ekonomik dhe për të vënë në përdorim burimin e pashfrytëzuar mjaftueshëm të rritjes që është kreativiteti femëror.
Fuqizimi ekonomik i grave rurale
Gratë dhe vajzat në zona rurale përballen me shumë sfida, shumica e të cilave janë të lidhura direkt me pabarazitë gjinore të pranuara në shoqëri, që rezultojnë në qasjen e pabarabartë të grave në pushtet dhe burime. Shkalla e punës informale është e lartë tek gratë në zona rurale, gjë që ua bën të vështirë grave të sigurojnë pronësi toke dhe pagesë të përshtatshme. GADC ka bashkuar ekspertizën e vet në zhvillimin rural me atë në çështjet gjinore për të ofruar rekomandime që integrojnë shqetësimet gjinore në politikat e zhvillimit rural të Shqipërisë. Nevoja për të përmirësuar legjislacionin shqiptar mbi pronësinë e tokës; për të rritur qasjen e grave rurale në sistemin gjyqësor; për të nxitur dhe lehtësuar qasjen e grave në kredi të buta; për të mundësuar mbështetje konkrete financiare për bizneset e reja në zonat rurale, janë vetëm disa nga veprimet kryesore që u janë propozuar institucioneve qeveritare. Veprime konkrete u janë propozuar gjithashtu edhe aktorëve civilë (OSHC-ve lokale dhe donatorëve).