Konferenca Kombëtare “Fuqizim, Rikuperim, Riintegrim: Fuqizimi i Shërbimeve për Viktimat e Dhunës me Bazë Gjinore”

Më 27 nëntor 2024, Tirana mirëpriti konferencën kombëtare të titulluar “Fuqizim, Rikuperim, Riintegrim: Fuqizimi i Shërbimeve për Viktimat e Dhunës me Bazë Gjinore”, organizuar nga Qendra “Aleanca Gjinore për Zhvillim” në bashkëpunim me “Rrjeti i Fuqizimit të Gruas në Shqipëri.” Aktiviteti ishte pjesë e projektit “Institucionalizimi i Shërbimeve Cilësore të Rehabilitimit dhe Riintegrimit për Viktimat e Dhunës II”, mbështetur nga Agjencia Austriake për Zhvillim. 

Qëllimi dhe objektivat e konferencës: Konferenca kishte për qëllim përmirësimin e cilësisë së shërbimeve të rehabilitimit dhe riintegrimit për të mbijetuarat e dhunës me bazë gjinore në Shqipëri. Duke sjellë së bashku vendimmarrës, profesionistë dhe përfaqësues të organizatave, ajo trajtoi nevojën për:

-Thellimin e kuptimit mbi standardet ndërkombëtare dhe përafrimin e praktikave kombëtare me to.
-Promovimin e bashkëpunimit ndërsektorial për shërbime më të integruara.
-Krijimin e një vizioni të përbashkët për të ardhmen e shërbimeve cilësore për të mbijetuarat.

Diskutime kryesore
Konferenca nisi me fjalët hapëse nga personalitete të njohura, si:

-Znj. Etilda Gjonaj, Deputete në Kuvendin e Shqipërisë, e cila theksoi rëndësinë e përafrimit të politikave shqiptare me standardet ndërkombëtare për mbështetjen e të mbijetuarave. 
-Znj. Denada Seferi Dibra, Zëvendës Ministre e Shëndetësisë dhe Mirëqenies Sociale, që foli mbi një qasje të shumëanshme për rehabilitimin dhe riintegrimin. 
-Znj. Monika Zach, Ambasadore e Austrisë në Shqipëri, që përcolli mbështetjen e Austrisë për avancimin e barazisë gjinore. 
-Znj. Fiona McCluney, Koordinatore Rezidente e Kombeve të Bashkuara në Shqipëri, United Nations Albania e cila ndau perspektivat globale mbi dhunën me bazë gjinore dhe rolin e bashkëpunimit ndërkombëtar në avancimin e shërbimeve të përqendruara te të mbijetuarat.

Momente frymëzuese dhe bashkëpunim - Gjatë sesioneve të ndryshme, folës dhe pjesëmarrës diskutuan:

-Kuadrin ndërkombëtar dhe politikat kombëtare për mbështetjen e viktimave të dhunës.
-Qasjet multi-sektoriale për rehabilitim dhe riintegrim, duke përfshirë përvojat e drejtpërdrejta të të mbijetuarave.

Një dëshmi emocionuese nga një e mbijetuar e dhunës shërbeu si pikë reflektimi për të gjithë pjesëmarrësit.

Gjithashtu, në konferencë u nënshkrua Marrëveshja e Grantit për projektin rajonal “Institucionalizimi i Shërbimeve Cilësore të Rehabilitimit dhe Riintegrimit për Viktimat e Dhunës II.”

Qendra “Aleanca Gjinore për Zhvillim” falenderon të gjithë pjesëmarrësit dhe kontribuesit për përkushtimin e tyre në këtë kauzë. Kjo konferencë përfaqëson një hap të rëndësishëm drejt forcimit të sistemeve mbështetëse dhe garantimit të një jete më të mirë për të mbijetuarat e dhunës me bazë gjinore.

"Asnjë Justifikim: Bashkë kundër Dhunës ndaj Grave dhe Vajzave"
#asnjejustifikim #NoExcuse