Prezantimi i Raportit të Hartëzimit Social LNOB në Bashkinë Elbasan

Me përfundimin e procesit të hartëzimit social për fëmijët me aftësi të kufizuara në Bashkinë Elbasan, Qendra Aleanca Gjinore për Zhvillim (GADC), në bashkëpunim me Shoqatën për Autonomi Vendore, organizoi një aktivitet të posaçëm për të prezantuar gjetjet kryesore dhe rekomandimet e raportit LNOB. Aktiviteti u zhvillua në partneritet të ngushtë me Bashkinë Elbasan dhe me pjesëmarrjen aktive të Kryetarit të Bashkisë, z. Gledian Llatja, dhe grupit të punës të bashkisë.

Gjatë prezantimit, u diskutuan gjetjet e bazuara në të dhëna konkrete që pasqyrojnë gjendjen e fëmijëve me aftësi të kufizuara në të gjitha 18 njësitë administrative të bashkisë. Ky aktivitet shërbeu si një platformë për të theksuar rëndësinë e politikëbërjes së bazuar në fakte dhe rolin thelbësor të të dhënave të detajuara në hartimin e politikave dhe shërbimeve përfshirëse që nuk lënë askënd pas.

U evidentuan sfidat kryesore që lidhen me aksesin në arsim, shërbime shëndetësore, mbështetje terapeutike dhe infrastrukturë publike — veçanërisht për vajzat dhe fëmijët në zonat rurale. Paralelisht, hartëzimi ofroi një pasqyrë të qartë të ofruesve ekzistues të shërbimeve dhe boshllëqeve që duhen adresuar, duke i mundësuar autoriteteve vendore të përcaktojnë prioritetet në hartimin e Planit Social 2024–2026.

Prezantimi u mbyll me një angazhim të fortë nga Bashkia Elbasan për të përdorur gjetjet e raportit si një udhërrëfyes për planifikimin, ndarjen e buxhetit dhe hartimin e politikave vendore që garantojnë përfshirjen aktive të fëmijëve me aftësi të kufizuara dhe familjeve të tyre në zhvillimin e komunitetit.